Disa rezidentë dolwn në rrugët e Shangait teksa disa zona te qendres financiare kanë reduktuar kufizimet drastike ndaj covid 19, duke lejuar të dalin jashtë një numër te caktuar personash. Pas izolimeve të kontestuara Shangai thotë se ka arritur objektivin “zero-Covid” edhe pse shumica e 25 milionë banorëve mbeten në izolim. Vetëm 4 milionë banorë raportohej se ishin lejuar dje të dilnin nga shtëpitë, teksa autoritetet justifikojnë masat e frikshme të mbylljes me rastet e shtuara të infektimeve. Prej muajit të kaluar Kina ka mbyllur në komplekset e banimit shumicën e qytetarëve, çka solli skena të rënda paniku dhe përleshje me autoritetet komuniste. Sëmundja është "efektivisht nën kontroll" në shumicën e qytetit, citohej të thoshte zyrtari shëndetësor i Shangai, Vu Ganyu. Prej fundit të muajit të shkuar rrjeti është mbushur me video të qytetarëve të bllokuar kinezë dhe të huaj, që nuk mund të dilnin nga komplekset rezidenciale. Në shumë raste ndaj banorëve është ushtruar dhunë ose izolimet janë bërë duke rrethuar pallatet me gardhe të larta. Zbutja e kufizimeve të kësaj jave ka shtuar shpresën për një kthesë në ecurinë shëndetësore dhe të qasjes së qeverisë.