SHBA po “luan me zjarrin” me “luftën e saj indirekte” që po ndjek kundër Rusisë, tha zëvendësministri i Jashtëm rus, Sergei Ryabkov, për agjencinë e lajmeve TASS. “Ne paralajmërojmë se ata po luajnë me zjarrin. Ata janë prej kohësh në një gjendje lufte indirekte me Federatën Ruse”, tha Ryabkov. Komentet e diplomatit të lartë pasqyrojnë shqetësimin e Rusisë mbi mbështetjen e vazhdueshme të Perëndimit ndaj Ukrainës. Sekretari i Jashtëm i Mbretërisë së Bashkuar Lord Cameron tha në fillim të këtij muaji se Ukraina ka të drejtë të përdorë armët e ofruara nga Britania për të goditur objektivat brenda Rusisë – ndërsa sekretari amerikan i shtetit Antony Blinken bëri komente të ngjashme gjatë një vizite këtë javë në Kiev. “Ata nuk arrijnë disi të kuptojnë se, për të kënaqur idetë e tyre gjeopolitike, ata po i afrohen një faze në të cilën do të jetë shumë e vështirë të kontrollohet ajo që po ndodh dhe të parandalohet një krizë dramatike”, shtoi Ryabkov, duke iu referuar SHBA-së. Ndërkohë, forcat ruse po zgjerojnë sulmet e tyre në vendbanimet kufitare të Ukrainës afër qytetit verilindor të Kharkivit, duke hapur një front të ri në lufte. Trupat ruse po përpiqen të marrin nën kontroll fshatrat e Ukrainës rreth 30 kilometra në veri të qytetit Kharkiv. Aktualisht, luftimet më të ashpra po ndodhin pranë qytetit kufitar, Vovchansk. Pamjet: AFP