Ambasada e Shteteve të Bashkuara, ajo e Britanisë dhe delegacioni i Bashkimit Europian në vendin tonë reaguan lidhur me kërcënimet ndaj përfaqësuesve të drejtësisë në vend, të bëra publike pas dëshmisë së të penduarit të Drejtësisë, Artan Tafani, i cili tha se Laert Haxhiu kishte planifikuar të vriste një prokurore të SPAK, dhe një avokate. Ambasada e Shteteve të Bashkuara shprehu shqetësimin e thellë duke theksuar se hetuesit, prokurorët dhe gjyqtarët duhet të jenë në gjendje të kryejnë detyrat e tyre pa kërcënime apo frikësim. Kërcënimin e dënoi edhe Bashkimi Europian që përmes një deklarate tha se “vazhdon të mbështesë Shqipërinë në përpjekjet e tij për forcimin e shtetit të së drejtës". Përmes një deklarate edhe ambasada britanike theksoi se do vazhdojë t'i mbështesë njerëzit e drejtësisë në misionin e tyre jetik për të garantuar sigurinë e qytetarëve shqiptarë”. Në një reagimin publik, edhe komuniteti i Prokurorëve dënon kërcënimet dhe shprehet se segmente të caktuara, po krijojnë klimë frymëzuese për sulme personale ndaj magjistratëve. Prokurorët e Shqipërisë inkurajon të gjithë aktorët e komunikimit publik në vend, që të kontribuojnë në ravijëzimin e një qasjeje të re më konstruktive dhe besimplotë karshi sistemit të drejtësisë, “si premisa për garantimin dhe jetësimin e parimeve të një shteti të së drejtës”. Pamjet: AFP