Një konflikt i nisur për motive xhelozie ka përfunduar në tragjedi në Vescovato të Kremonës të Italisë, ku një 24-vjeçar shqiptar humbi jetën pasi u godit me thikë në fyt. Sipas mediave italiane, viktima është Nurian Dalipaj, ndërsa autori i dyshuar është Mattia Miraglia, 32 vjeç, i cili është arrestuar dhe po hetohet për vrasje dhe tentativë vrasjeje. Ngjarja nisi mbrëmjen e së dielës në një bar në Kremona, ku Miraglia pa ish-të dashurën e tij duke biseduar me Dalipajn. Pas një debati dhe një përleshjeje të shkurtër jashtë lokalit, 32-vjeçari u largua drejt banesës së tij në Vescovato. Sipas mediave të huaja, konflikti nuk përfundoi aty. Pak më vonë, Nurian Dalipaj dhe dy vëllezërit e tij shkuan pranë banesës së Miraglias, ku situata degjeneroi sërish në përplasje fizike. Dyshohet se 32-vjeçari doli nga banesa i pajisur me një thikë kuzhine dhe, gjatë sherrit, goditi me thikë në fyt 24-vjeçarin shqiptar, duke i shkaktuar plagë fatale. Pavarësisht ndërhyrjes së menjëhershme dhe transportimit në spital, Dalipaj nuk mundi të mbijetojë dhe ndërroi jetë në duart e mjekëve. Gjatë konfliktit mbeti i plagosur rëndë edhe vëllai 20-vjeçar i viktimës, i cili u dërgua në terapi intensive, ndërsa autori i dyshuar pësoi një dëmtim në dorë dhe ndodhet nën mbikëqyrje mjekësore në spitalin Maggiore. Sipas dëshmive të banorëve dhe personave që njihnin palët e përfshira, përplasja mes tyre kishte nisur më herët dhe dyshohet se lidhej me ish-partneren e 32-vjeçarit. Hetuesit po verifikojnë të gjitha rrethanat për të përcaktuar saktësisht dinamikën e ngjarjes dhe përgjegjësitë e secilit person të përfshirë. Krimi ka tronditur komunitetin e vogël të Vescovatos, ndërsa autoritetet italiane vijojnë punën për zbardhjen e plotë të vrasjes.