Një ngjarje e rëndë ka ndodhur në fshatin arvanitas, Shkurta, mes Athinës dhe Thivës në Greqi. Trupi i një burri të djegur është gjetur në një automjet në një fushë bujqësore. Viktima ende nuk është identifikuar, ndërsa sipas të dhënave paraprake nga policia ai u gjet i lidhur me pranga dhe dyshohet se kishte vdekur prej të paktën 48 orësh. Sipas informacioneve të para nga media greke “Kathimerini”, ky mund të jetë një shtetas shqiptar i zhdukur disa ditë më parë, pas një udhëtimi që ai nuk e përfundoi. Të afërmit e tij kishin raportuar zhdukjen, por deri tani nuk dihet asgjë më shumë për identitetin e tij. Automjeti i djegur, i cili kishte targa të falsifikuara, është zbuluar nga një gjuetar i zonës. Sipas autoriteteve makina ishte vjedhur. Organet hetimore kanë nisur hetimet për të zbardhur ngjarjen, ndërkohë që dyshimet e para janë se kjo mund të jetë vepër e krimit të organizuar.