Një zjarr i rënë mbrëmjen e sotme ka rrënuar një banesë në Allkaj, qendër administrative e bashkisë Lushnje. Zjarri ka rënë në një banesë e cila ishte e lidhur dhe me dy të tjera nën një çati. Që prej mbrëmjes së sotme Emiljano Cullhaj do të jetë i pastrehë. 39-vjeçari jetonte i vetëm në këtë shtëpi, e cila për shkak të zjarrit tashmë është totalisht e rrënuar. Emiljano ka qenë në kafenë e fshatit në momentet kur e kanë njoftuar se banesa e tij po digjej. Zjarrfikësit e mbërritur në vend kanë bërë punën e tyre dhe kanë shuar zjarrin, por dëmi është total. Asnjë prej orendive shtëpiake, veshjeve, krevateve dhe divaneve nuk i ka shpëtuar flakëve. Zjarrfikësit dyshojnë se mund të ketë qenë ndonjë shkëndijë elektrike që ka shkaktuar zjarrin, pasi asnjë person nuk ishte në banesë në momentin e rënies së zjarrit.