Analisti i njohur Ilir Demalia ka rrëfyer për Top Channel për dhunën me të cilën u përball mëngjesin e mërkurës sapo doli nga shtëpia. Demalia thotë se u dhunua nga dy persona pikërisht se bëri një detyrë qytetare, të cilën çdo qytetar i këtij vendi duhet ta bëjë, të denoncojë çdo rast shkelje të cilën vëren apo përballet. “Mirë le të themi jam. Kam një dhimbje në qepallën e syrit, ka një çarje tek vetulla, është qepur. Tani e ndiej që kam dhimbje në sy. Do të bëj kontrolle më vonë. Në fakt përpara një muaji, unë bëra një detyrë që duhet ta bëjë çdo qytetar. Që këto cubat, që dje kanë qenë baballarët e këtyre spiunave të sigurimit që kanë futur njerëz në burg, këta janë ata palaço cuba që sundojnë sot shoqërinë. Këtu fajin e ka shteti, sepse shteti ka lënë këta cuba të bëjnë si të duan vetë. Unë sjell në vëmendje që nëse ke për të dalë nga pallati, nuk del dot, sepse aty ka parking makinash. Aty vjen policia të vendosin gjoba dhe të lirojnë një ditë. Të nesërmen vazhdojnë prapë. Pastaj sot po dilja nga shtëpia, nuk e kisha lajmëruar policinë, po policia bën detyrën e vet dhe çdo qytetar duhet ta bëjë, pra ky është edhe defekti i shoqërisë sonë, se qytetarët kanë frikë të mbrojnë vetveten nga pakicat rrugaçërore të cubave, që bëjnë ligjin tek njerëzit normal që duan të jetojnë qetësisht, për këto cuba nuk kam mëshirë edhe pas kësaj që ndodhi, nuk i fal asgjë. Nuk është rastësi, nuk është aksident. Kur dola më thanë që çfarë ke bërë, ke thirrur policinë, me fjalorin që dinë të përdorin ata”, tha Demalia. Demalia nuk e lidh dhunën me qëndrimet e tij publike apo politike edhe pse, për shkak të këtyre qëndrimeve përballet me urrejtje dhe kërcënime të vazhdueshme. Ai vë në dukje se në këtë vend çdo njeri që punon, është i suksesshëm, apo qoftë edhe që ka mendime të ndryshme nga turma përballet me urrejtje. Urrejtja dhe dhuna sot kanë pushtuar Bulevardin thotë Demalia, teksa siç shprehet ai thirrje të vazhdueshme dhune bëhen në sy të fëmijëve. “Kur dola më thanë që çfarë ke bërë, ke thirrur policinë, me fjalorin që dinë të përdorin këta, që fatkeqësisht e ke përditë në Bulevard atë fjalor. Pavarësisht se thonë nuk ka dhunë, dhunë verbale ka gjatë 24 orëve. Kështu në këtë psikologji, marrin edhe fëmijët aty i mësojnë me këtë fjalor dhe fëmija rritet me atë urrejtje. Dhe do të kemi këtë prodhim kafshëror që kemi nëpër rrugët e Tiranës dhe rrugëve të tjera të Shqipërisë. Pra shteti duhet të marri masa të pamëshirshme”, tha ai. Ilir Demalia, sapo la spitalin, deklaroi se nuk do të heshtë në mendimet e gjykimet e tij, e as ndaj denoncimeve të shkeljeve si detyrë qytetare, ndërkohë i bëri thirrje sidomos medias të luajë një rol të madh sensibilizues në përçimin e mesazheve kundër gjuhës së urrejtjes.