Të gjithë janë fajtorë për dhunën brenda pallatit mbretëror, ku u përfshi Princi Leka Zogu I dytë, ish-bashkëshortja dhe babai i saj. Në këtë konkluzion ka dalë Prokuroria e Tiranës, e cila ka shpallur pretencën për rastin e dhunës, duke kërkuar dënimin me 1 vit e 6 muaj burgim për Princin Leka Zogu II, dhe nga 6 muaj heqje lirie për ish-bashkëshorten e tij Elia Zaharia dhe babanë e saj, Gjergj Zaharia. Megjithatë, nëse tre të akuzuarit shpallen fajtorë për akuzën e dhunës në familje, prokruoria kërkon që dënimi t’u konvertohet në shërbim prove. Seanca në gjykatë është caktuar në datën 13 dhjetor. Më 25 prill Gjykata e Tiranës vendosi zgjidhjen e kurorës martesore mes Princ Lekës dhe aktores së njohur elia zaharia. Në vendimin e Gjykatës thuhet se çifti, prindër të një vajze të vogël, kanë vendosur të ndahen pasi kanë pasur konflikte të vazhdueshme, mungesë komunikimi dhe se kishin ndërprerë bashkëjetesën. Konfliktet e çiftit u bënë publike pas qarkullimit të një videoje, ku Princi Leka, babai i Elias dhe vetë ajo, konfliktoheshin fizikisht mes tyre. Pas publikimit të pamjeve, ata përfunduan në Gjykatë, me urdhër mbrojtjeje ndaj njëri-tjetrit. Princ Leka njoftoi zyrtarisht ndarjen më 15 janar, ku tha se kishin nisur dhe procedurat e nevojshme ligjore. Pas tij reagoi edhe Elia Zaharia, dhe mesazhi i përbashkët ishte se mirëqenia e vajzës së tyre do të mbetet në qendër të vëmendjes.