Pavarësisht paralajmërimeve të autoriteteve ruse për tubimet e paautorizuara shumë njerëz kanë shkuar në varrin e kritikut më të fortë të Kremlinit, Aleksey Navalni, i cili vdiq në mënyrë misterioze më 16 shkurt në një burg në Arktik, ku vuante dënimin për akuzat për ekstremizëm në lidhje me aktivitetet e Fondacionit të tij Kundër Korrupsionit. Ashtu si edhe ditën kur u varros, rusët i sfiduan autoritetet dhe vunë lule mbi varrin e Navalnit, në ditën e ditëlindjes së tij. Ndërkohë familjarët e tij e kanë përkujtuar Navalnyn, jashtë Rusisë. E veja e tij, Yulia Navalnaya, 4 qershorin, ditën kur lideri i vdekur i opozitës ruse do të mbushte 48-vjeç e përkujtoi përmes një shërbese në Kishën e Shën Marisë në Berlin të Gjermanisë. “Në këtë ditëlindje, jo vetëm që nuk harrojmë, do vazhdojmë me kauzën për të cilën ai dha jetën dhe vdiq. Lirinë. Lumturi dhe bekime për të gjithë njerëzit që ngrihen për liri”, thuhej në mesazhin e shpërndarë nga kisha.Vdekja e Navalnyt sipas autoriteteve në Moskë erdhi për shkaqe natyrale, por pikëpyetjet u ngritën që prej faktit që autoritetet nuk e dorëzuan trupin e tij tek familjarët për gati një javë. E para që akuzoi Presidentin Putin për vrasjen e tij ishte, bashkëshortja e Navalnyt, Julia, por edhe liderë perëndimore, përfshi presidentin amerikan Joe Biden kanë thënë se mbajnë Moskën përgjegjëse për vdekjen e tij. Aleksey Navalny u arrestua në janar të vitit 2021, menjëherë pasi u kthye në Rusi nga Gjermania, ku u trajtua pas helmimit me agjentin nervor noviçok. Ndonëse akuzonte vazhdimisht rivalin e tij Putin, se kishte urdhëruar helmimin e tij, Navalny e sfidoi atë duke u kthyer në Rusi në janar të vitit 2021, ku u arrestua me një akuzë për shkelje të lirimit me kusht dhe u dënua disa herë, për disa akuza, duke e lënë për 30 vite pas hekurave.