Janë zbardhur detaje të reja nga hetimet e policisë lidhur me ekzekutimin e çiftit Mujeci në Balldren të Lezhës. Dy ditë pas atentatit të rëndë ku humbën jetën Kreshnik dhe Gentjana Mujeci, hetimet e Policisë së Lezhës kanë zbuluar një tjetër person të përfshirë në ngjarje, si dhe mënyrën e organizimit të krimit të ndodhur më 26 prill. Në fokus të hetimeve është vënë 22-vjeçari Besnik Kolndreu, në banesën e të cilit është gjetur një automjet tip “Volkswagen” pa targa, i dyshuar si mjeti i përdorur nga autorët gjatë sulmit me armë. I riu është shpallur në kërkim, ndërsa nën hetim është vënë edhe babai i tij 79-vjeçar. Sipas Policisë, automjeti dyshohet se është marrë me qira në Rinas pak ditë para ngjarjes nga motra e Florin Mhillaj, ndërsa më pas i janë hequr targat dhe është përdorur në atentat. Në këtë veprim dyshohet se ka qenë i përfshirë Florin Mhillaj, i cili së bashku me dy kushërinjtë e tij, Renaton dhe Adrianon, janë pjesë e listës së të kërkuarve. Hetimet kanë zbuluar se grupi ka vepruar i ndarë në dy makina, një “Audi” që ka ndjekur automjetin e viktimave dhe “Volkswagen”-i pa targa, nga i cili është qëlluar me breshëri plumbash drejt çiftit Mujeci. Policia vijon hetimet për dokumentimin e plotë të ngjarjes dhe identifikimin e të gjithë personave të përfshirë në këtë atentat të rëndë që tronditi Lezhën.