Policia në Austri ka marrë në pyetje tre adoleshentë të dyshuar për planifikimin e një sulmi në koncertin që do të mbante Taylor Swift. Agjencitë e huaja të inteligjencës ndihmuan autoritetet të zbulonin skemën që kishin planifikuar të rinjtë, sipas ministrit të Brendshëm të vendit. Një burim i tha CNN se SHBA lëshoi një paralajmërim për autoritetet në Vjenë. Organizatorët anuluan tre koncerte, të cilat ishin planifikuar të mbaheshin në kryeqytetin evropian nga e enjtja deri të shtunën. Hetuesit zbuluan një rezervë kimikatesh, pajisje shpërthyese dhe detonatorë në shtëpinë e të dyshuarit kryesor, një simpatizant 19-vjeçar i ISIS-it, i cili ishte radikalizuar në internet, sipas autoriteteve. I riu, i cili u arrestua të mërkurën në mëngjes, planifikoi të vriste veten dhe “një numër të madh njerëzish”, sipas kreut të agjencisë vendase të inteligjencës. U ndaluan edhe dy të dyshuar të tjerë, të moshës 17 dhe 15 vjeç. 17-vjeçari punonte në një kompani objektesh që do të ofronte shërbime në ambientet e koncertit. Ai ishte afër stadiumit kur u arrestua dhe së fundmi ishte ndarë me të dashurën e tij. Pak është bërë e ditur për 15-vjeçarin. Prokurorët do të vendosin më vonë nëse ai ishte dëshmitar apo i përfshirë drejtpërdrejt në komplotin e pretenduar.