Pas prangosjes së Lulzim Berishës, autoritetet spanjolle kanë dhënë detaje nga aksioni I zhvilluar. Ministria e Brendshme e Spanjës sqaroi se menjëherë pas marrjes së njoftimit nga autoritetet shqiptare se i shumëkërkuari Lulzim Berisha fshihej në këtë shtet u organizua një aksion I gjerë ku u aktivizuan disa agjentë. Kërkimet e tyre u fokusuan në zonën bregdetare. Pas disa javësh kërkime, ekipi special I FAST e gjeti Lulzim Berishën në një apartament në San Juan de Alicante. Gjatë vëzhgimeve u identifikua dhe një anëtar tjetër I bandës, I cili po përgatitej që të bënte të mundur shpërnguljen e të arratisurit nga zona. Kjo gjë I detyroi autoritetet që të ndërhynin dhe të prangosnin Lulzim Berishën. Ministria spanjolle sqaron më tej dhe gjithë aktivitetin kriminal të tij nga viti 1998. Në vitin 2020 Lulzim Berisha u shpall në kërkim nga SPAK për 2 vrasje të ndodhura në 2005-ën, atë të Vajdin Lames dhe Klodian Saliut, të cilat hetuesit i zbardhën me 15 vite vonesë. Më vonë çështja ndaj Vajdin Lames u pushua dhe vijonte vetëm për Klodian Saliun. Përveç vrasjeve, emri i Lulëzim Berishës lidhet edhe me trafik ndërkombëtar droge, prostitucion dhe trafik armësh. Ai u arrestua më 6 prill të vitit 2006 për 10 akuza, mes të cilave krijimin e një organizate kriminale dhe një seri vrasjesh e atentatesh të kryera në vitet 98-99.Lulzim Berisha qëndroi 10 vjet e tetë muaj në burg deri kur më 5 dhjetor të vitit 2016, u lirua me kusht nga burgu dhe u punësua në Bashkinë e Durrësit, me një vendim të diskutueshëm të Gjykatës së Apelit.