Ministri i Jashtëm i Danimarkës ka thënë se ka një “mungesë dakordësie themelore” me presidentin amerikan, Donald Trump në lidhje me Groenlandën, edhe pas bisedimeve të zhvilluara në Washington me zv.presidentin JD Vance dhe Sekretarin e Shtetit, Marco Rubio. Lars Lokke Rasmussen thotë “se është e qartë se Trump ka dëshirën për të ‘pushtuar’ Groenlandën”, por ai beson se takimi ka arritur të “ndryshojë disi qëndrimin amerikan”. “E bëmë shumë, shumë të qartë se kjo nuk është në interes të Groenlandës”, tha ai. “Danimarka është padyshim në anën e duhur të historisë”, shtoi ministri. Të dyja palët megjithatë kanë rënë dakord që ta krijojnë një grup pune për të diskutuar mënyra për zgjidhjen e mosmarrëveshjeve. “Është në interesin e të gjithë që të bashkëpunojmë, por që të pajtohemi me zgjidhjen që do t’i japim, atëherë duhet të adresohen disa nga shqetësimet, duke respektuar njëkohësisht integritetin e territorit të mbretërisë daneze, dhe vendosmërinë e popullit të Groenlandës”, ka thënë ministri Rasmussen. Ai ka theksuar se përpjekja e SHBA-së për ta marrë Grenlandën është “absolutisht e panevojshme”, duke shtuar se nuk ka ndonjë rrezik të afërt nga Kina dhe Rusia. Nga ana tjetër zëvëndëskryetari i Këshillit rus të Sigurisë, Dimitry Medvedev provokoi europianët dhe tha se ata nuk do të jenë në gjendje t’i rezistojnë pushtimit të Groenlandës nga SHBA. Në postimin e tij, ai komentoi deklaratën e Presidentit të Francës, Emmanuel Macron, se “nëse ka një shkelje të sovranitetit në Groenlandë, pasojat do të jenë të pallogaritshme”. “Gjeli gal tha se nëse preket sovraniteti i Danimarkës, pasojat do të jenë të pallogaritshme. Edhe çfarë do të bëjnë ata? A do të rrëmbejnë presidentin amerikan? Apo do të hedhin armë bërthamore mbi SHBA-në? Jo, sigurisht. Ata thjesht do të frikësohen… dhe do ta dorëzojnë Groenlandën. Dhe ky do të jetë një precedent i madh europian”, tha Medvedev.