Kryetarja e Kuvendit të Kosovës, Albulena Haxhiu, e ka shtyrë për të dielën vazhdimin e seancës për konstituimin e legjislaturës së 11-të, mes mosmarrëveshjeve për votimin e nënkryetarëve. Shumica parlamentare e përbërë nga Vetëvendosja nuk votoi kandidatin për nënkryetar të Partisë Demokratike të Kosovës, ndonëse kjo e fundit votoi për kandidatin për nënkryetar të Vetëvendosjes. Të ndodhur në këtë situatë, PDK-ja braktisi sallën e Kuvendit dhe njoftoi se nuk do të marrë pjesë më në seancën konstituive, ndërsa çështjen do ta dërgojë në Gjykatën Kushtetuese. Kryeministri në detyrë i Kosovës, Albin Kurti, tha se PDK-ja nuk duhet ta kishte braktisur procesin e konstituimit të Kuvendit. Në punimet e seancës konstituive të Kuvendit nuk merr pjesë as partia më e vogël, Aleanca, duke thënë se seancat për konstituimin e Kuvendit po bëhen duke shkelur kushtetutën. Kuvendi i Kosovës konsiderohet i konstituuar vetëm pasi të zgjidhen edhe pesë nënkryetarët. Me konstituimin e Kuvendit, do të hapej rruga për formimin e Qeverisë së re të Kosovës dhe zgjedhjen e presidentit. Për zgjedhjen e presidentit nevojitet prania e 80 deputetëve në Kuvendin me 120 vende që votimi për presidentin e Kosovës të jetë i vlefshëm. Nëse deputetët nuk arrijnë të zgjedhin kreun e ri të shtetit, qytetarët do t’i drejtohen sërish kutive të votimit. Ato do të ishin zgjedhjet e katërta parlamentare dhe të dytat, për shkak të moskonsensusit për presidentin, që nga shkurti i vitit 2025.