Zbardhen detaje të reja nga dosja hetimore e operacionit të zhvilluar dy javë më parë në tunelin e Skërficës, në aksin Kardhiq–Delvinë, ku u sekuestruan katër pistoleta tip “Glock” dhe u arrestua 31-vjeçari Kejdi Banaj. Sipas hetimeve, policia kishte siguruar informacione se Banaj po transportonte armë zjarri drejt Sarandës me një automjet të marrë me qira. Dyshohej gjithashtu se gjatë rrugës do të merrte rreth 500 gram kokainë në Lushnjë për ta shpërndarë në doza në Sarandë. Gjatë kontrollit, efektivët gjetën katër pistoletat të fshehura nën tapicerinë e sediljes së përparme, brenda një qeseje të zezë.Në dëshminë e dhënë në polici, 31-vjeçari identifikoi personin që, sipas tij, i kishte lënë armët në automjet. Ai deklaroi se një i njohur me inicialet E. S. i kishte kërkuar ta shoqëronte në Sarandë për të gjetur një apartament me qira dhe se në Tiranë kishte vendosur në makinë një qese të zezë, përmbajtjen e së cilës pretendon se nuk e dinte.Nga hetimet rezulton se E. S., 26 vjeç nga Tirana, i përmendur nga Banaj si organizatori i transportit të armëve, është shpallur në kërkim edhe për një ngjarje të ngjashme të ndodhur në muajin mars. Gjykata caktoi ndaj Kejdi Banajt masën e sigurisë “Arrest në burg”, ndërsa hetimet vijojnë për identifikimin dhe kapjen e personave të tjerë të përfshirë.