Ka nisur me tensione këtë të hënë seanca e parë plenare e sesionit të dytë të legjislaturës së dhjetë të Kuvendit të Shqipërisë. Ka qenë deputeti Edmond Spaho, ai që mori fjalën fillimisht në këtë seancë, duke kundërshtuar vendimin e Partisë Demokratike për të përjashtuar nga grupi parlamentar i Partisë Demokratike katër deputetë që kanë dalë në mbështetje të ish-kryeministrit Sali Berisha. Në fjalën e tij, Spaho theksoi se nuk e kishte menduar se do të vinte një ditë urdhri që Lulzim Basha do të sillte kohën e diktaturës, duke iu referuar përjashtimit të tij nga grupi i parlamentar i kësaj partie. Ai tha se nuk e përjashton dot Basha nga partia, sipas tij, njeriu që futi kriminelë në selinë e PD-së dhe qëlloi më gaz lotsjellës mbështetësit e kësaj force politike.