Dy ditë pasi 19 prej protestuesve po mbahen të arrestuar në komisariatin numër 3 në kryeqytet, pas përplasjeve të dhunshme para Kuvendit, vjen ky denoncim. Avokati i njërit prej të arrestuarve denoncon se klienti i tij është dhunuar brenda komisariatit. Sipas tij, është ushtruar dhunë nga efektivët e policisë ndaj një të arrestuari, që vuan nga epilepsia. Menjëherë pas denoncimit reagoi dhe ministri i Brendshëm, Besfort Lamallari, i cili njofton se ka kërkuar informacion nga Policia e Shtetit lidhur me rastin. “Policia e Shtetit më ka informuar se pretendime të tilla janë totalisht të pabaza dhe të pavërteta. Më pas Agjencia e Mbikëqyrjes Policore ka nisur menjëherë verifikimet mbi pretendimet e parashtruara, duke administruar të gjithë informacionin e nevojshëm. Por ndërkohë institucioni i Avokatit të Popullit, i cili ka vepruar kryesisht dhe pavarësisht prej Policisë së Shtetit duke i vizituar të ndaluarit për akte dhune, po ashtu nuk ka shtruar asnjë problem të kësaj natyre”.