Gjykata e Posaçme Antikorrupsion shpalli fajtorë dhe dënoi gjashtë zyrtarë të Bashkisë së Divjakës, pas hetimeve për shkelje të barazisë në tendera në vlerën e 1 milion eurove. Bëhet fjalë për zyrtarët e bashkisë Dorjan Spaho, Sara Xhepa (Doko), Roklejd Malko, Fatos Veliu, Elbareta Nishica dhe Vojsava Leçini. Zyrtarët Dorjan Spaho, Sara Xhepa dhe Roklejd Malko u shpallën fajtorë për veprën penale shkelje e barazisë në tendera dhe fillimisht për ta u kërkua dënimi me 1 vit burgim, e më pas me ulje dënimi në 8 muaj. Për të tre të pandehurit, gjykata vendosi pezullimin e dënimit me burg, duke e zëvendësuar me 120 orë shërbim prove. Për tre të pandehurit e tjerë, Fatos Veliu, Elbareta Nishica dhe Vojsava Leçini, gjykata vendosi liri me kusht për 16 muaj, duke iu hequr të drejtën për të ushtruar funksione publike për 5 vite. Çështja ndaj gjashtë zyrtarëve lidhet me tre procedura tenderimi të zhvilluara nga Bashkia Divjakë, me një vlerë totale prej rreth 1 milion eurosh. Sipas SPAK, hetimet zbuluan parregullsi në procedurat e prokurimit publik, të cilat dyshohej se cenonin konkurrencën dhe favorizonin operatorë të caktuar ekonomikë.