Nuk ka vonuar të mbërrijë reagimi i ashpër i kryeministrit të Kosovës, Albin Kurti për dënimin e ish-komandantit të Ushtrisë Çlirimtare të Kosovës, Salih Mustafa në Hagë me 26 vjet heqje lirie. Dhomat e Specializuara të Kosovës e shpallën fajtor Mustafën për vrasje të paligjshme, ndalim arbitrar dhe torturë. Kurti e cilësoi vendimin “indinjues” e kujtoi se ka “mijëra vrasës nga Serbia” që as janë gjykuar e as janë dënuar për “mizoritë e kryera në Ballkan”. Vetëm 26 serbë janë dënuar për mbi 12.000 të vrarë dhe mbi 20.000 të dhunuar seksualisht në Kosovë. I bie që secili prej të dënuarve serbë mesatarisht të ketë vrarë mbi 462 shqiptarë dhe të ketë dhunuar 770 syresh. E megjithatë ata kanë marrë dënime shumë më të lehta se ai që iu dha sot Salih Mustafës, i cili ka luftuar jo për të pushtuar ndonjë vend tjetër, por për të çliruar vendin e vet. Ky vendim është indinjues. Cili është mesazhi që i jep ky vendim ukrainasve që sot luftojnë kundër agresorit?