Të paktën nëntë persona humbën jetën gjatë përleshjeve midis policisë dhe mbështetësve të liderit të opozitës së Senegalit, Ousmane Sonko, i cili u dënua me dy vite burg për korrupsion. Menjëherë pas shpalljes së vendimit, përleshjet shpërthyen në të gjithë vendin, me partinë e Sonkos që bëri thirrje që njerëzit të dilnin në rrugë. Protestuesit hodhën gurë, dogjën automjete dhe në disa vende ngritën barrikada ndërsa policia hodhi gaz lotsjellës. Sipas njoftimit të qeverisë pas dhunës vendosën një ndalim gjithëpërfshirës për përdorimin e disa platformave të rrjeteve sociale, që po përdoreshin për të nxitur protestat. Një ditë më parë Sonko u shpall fajtor për korruptim të të rinjve, por u lirua nga akuzat në lidhje me përdhunimin dhe kërcënimet me vdekje ndaj një gruaje të punësuar në një qendër masazhi. Ai mori një dënim me dy vjet burg, pavarësisht mungesës së tij në gjyqin e kryeqytetit. Avokati i Sonkos tha se ende nuk është lëshuar një urdhër arrestim për politikanin. Sonko, i cili doli i treti në zgjedhjet presidenciale të Senegalit në vitin 2019 dhe gëzon popullaritet të konsiderueshëm, ka akuzuar rivalët për akuzat e ngritura, të cilat pretendon se janë krijuar për të penguar kandidaturën e tij në zgjedhjet e ardhshme presidenciale të vitit 2024. Dënimi për veprën penale mund të shkojë deri në pesë vjet burgim dhe një gjobë që tejkalon shumën prej 6,000 dollarësh.