Analisti i njohur Ilir Demalija ka rrëfyer për Top Channel për dhunën me të cilën u përball mëngjesin e mërkurës sapo doli nga shtëpia. Demalija thotë se u dhunua nga dy persona pikërisht se bëri një detyrë qytetare, të cilën çdo qytetar i këtij vendi duhet ta bëjë, të denoncojë çdo rast shkelje të cilën vëren apo përballet. Demalija nuk e lidh dhunën me qëndrimet e tij publike apo politike edhe pse, për shkak të këtyre qëndrimeve përballet me urrejtje dhe kërcënime të vazhdueshme. Ai vë në dukje se në këtë vend çdo njeri që punon, është i suksesshëm, apo qoftë edhe që ka mendime të ndryshme nga turma përballet me urrejtje. Urrejtja dhe dhuna sot kanë pushtuar bulevardin thotë Demalija, teksa siç shprehet ai thirrje të vazhdueshme dhune bëhen në sy të fëmijëve. Ilir Demalija, sapo la spitalin, deklaroi se nuk do të heshtë në mendimet e gjykimet e tij, e as ndaj denoncimeve të shkeljeve si detyrë qytetare, ndërkohë i bëri thirrje sidomos medias të luajë një rol të madh sensibilizues tnë përçimin e mesazheve kundër gjuhës së urrejtjes.