David Beckham është shpallur zyrtarisht “Sir David Beckham” pasi Mbreti Charles i dorëzoi atij titullin e kalorësit në një ceremoni madhështore në Kalanë e Windsor-it, duke i dhënë fund më shumë se një dekade pritjeje. Ish-kapiteni i Anglisë dhe ylli i Manchester United, tashmë nëmoshën 50 vjeçare, mori nderimin e lartë për kontributin e tij në sport dhe bamirësi, në një moment të veçantë që u ndoq nga prindërit e tij dhe bashkëshortja Victoria Beckham, të cilët e shoqëruan me krenari. Beckham, ishte propozuar për herë të parë për këtë titull të lartë në vitin 2011 pas rolit të tij kyç në sigurimin e Lojërave Olimpike “Londra 2012”, por problemet e shfaqura nga përfshirja e tij në një skemë shmangieje tatimore ja shtyu shqyrtimin e emrit të tij për titullin e nderit. Pas pastrimit të plotë të financave të tij dhe kontributit të vazhdueshëm në fushën humanitare, rruga drejt nderimit u hap sërish. Beckham, I cili ka luajtur 115 ndeshje me kombëtaren angleze, është gjithashtu ambasador i The King’s Foundation, fondacionit të themeluar nga Mbreti Charles, me të cilin ndan një miqësi të ngushtë.