Udhëheqësit evropianë shprehën shqetësim në lidhje me planin e Shteteve të Bashkuara të Amerikës për t'i dhënë fund luftës në Ukrainë, pasi thonë se projekt-propozimet do të kërkojnë punë shtesë. Në një deklaratë të përbashkët të lëshuar në samitin e G20 të zhvilluar në Afrikën e Jugut, ata thanë se plani "përfshin elementë të rëndësishëm që do të jenë thelbësorë për një paqe të drejtë dhe të qëndrueshme", por përmendën shqetësime mbi kufijtë dhe kufizimet për forcat e armatosura të Ukrainës. Deklarata vjen një ditë pasi Presidenti ukrainas Volodymyr Zelensky paralajmëroi se Kievi përballet me "një nga momentet më të vështira në histori" për shkak të presionit për të pranuar planin - detajet e të të cilit janë parë si të favorshme për Moskën. Presidenti i SHBA-së, Donald Trump, i ka dhënë Ukrainës afat deri më 27 nëntor për të pranuar planin me 28 pika, ndërsa presidenti i Rusisë, Vladimir Putin, tha se ai mund të jetë "baza" për një zgjidhje. Deklarata e përbashkët u nënshkrua nga udhëheqësit e Kanadasë, Finlandës, Francës, Irlandës, Italisë, Japonisë, Holandës, Spanjës, Mbretërisë së Bashkuar, Gjermanisë dhe Norvegjisë. E nënshkruan edhe dy zyrtarë të lartë të BE-së. Në deklaratë thuhej: “Jemi të gatshëm të angazhohemi për të siguruar që një paqe e ardhshme të jetë e qëndrueshme. Jemi të qartë në parimin se kufijtë nuk duhet të ndryshohen me forcë.” "Ne jemi gjithashtu të shqetësuar nga kufizimet e propozuara për forcat e armatosura të Ukrainës, të cilat do ta linin Ukrainën të cenueshme ndaj sulmeve të ardhshme."