Po bën xhiron e medias në Spanjë dhe jo vetëm deklarata e kreut të Partisë Popullore, Alberto Nunez Feijoo, i cili aspiron të pasojë socialistin Pedro Sanchez në postin e kryeministrit, se kishte probleme me anglishten. Ish-guvernatori i rajonit të Galicias, shpjegoi në një intervistë dhënë ”Telecinco”, se nuk kishte probleme me dialektin kastilian apo gal, por me anglishten. ”Problemi im nuk është galishtja apo dialekti kastilian, problemi im është anglishtja, ashtu si shumica e spanjollëve”, tha ai. “Më duhet të studioj, është detyra ime”, shtoi ai. ”Kam filluar një kurs anglishteje që nga e hëna”, tha Feijoo. ”Por, nuk ka problem. Gjëja më e rëndësishme në samitet ndërkombëtare, që normalisht mbahen me përkthyes, është të dish se çfarë të thuash”, shton Feijoo.