Arlinda Dudaj ishte e vetmja botuese e pranishme në dëgjesën për projektligjin mbi të drejtat e autorit ne Komisionin për Kulturën, Turizmin dhe Diasporën mes pesë shtëpive botuese që ishin ftuar. Në mbledhjen e kësaj të premteje ishte dhe kryetari i Shoqatës së Përkthyesve, Rexhep Hida. Ata paraqitën ngërçin që shkaktohet mes mes marrëveshjeve private me autorët e huaj dhe afateve që përcakton ligji shqiptar për shfrytëzimin e veprës dhe kërkuan më shumë sqarime për nenin që thotë se e drejta e përkthimit konsiderohet për 5 vjet. Arlinda Dudaj – Një nga gjërat që nuk e gjej këtu është që te të drejtat e autorit, kur ne marrim një vepër të një autori të huaj, e marrim për një kohë të caktuar 5-7 vite. Ka qenë e shkruar që e drejta e përkthimit ka qenë 3 vite, por kjo është korrigjuar, ka qenë një problem që ne e kemi diskutuar.... Pika 4, nëse kontrata e të drejtës së autori nuk parashikon afatin e vlefshmërinë, llogaritet 3 vite ose 5 vite nëse ka të bëjë me përdorimin e veprës në një formë të përshtatur. Borana Ajazi – Faleminderit për sugjerimet. Një sqarim për nenin 48 pika 4. Neni aktual ka të bëjë në rastin se mungon një afat në raportin mes botuesve dhe përkthyesve. Një temë e rëndësishme për botuesit është pirateria me shpërndarjen e paligjshme të veprave që dëmton të drejtën e autorit. Arlinda Dudaj – Ka shumë raste që ka një lloj pirateria. Edhe kjo pjesa e përkthimit, dikush e merr, e vjedh, këtë e bëjnë dhe botuesit me njëri-tjetrit. Këtu nuk e di sa ky ligj realisht e mbron. Rexhep Hida, kryetar i shoqatës së përkthyesve – Nuk mendoj se këtu sundon pirateria! Borana Ajazi – Mendoj se ka pirateri. Megjithatë, ligji e ka tani parashikimin për të bllokuar materiale që shkelin të drejtën e autorit. Ndërsa Shoqata e Përkthyesve theksoi nevojnë për më shumë shpërblim për përkthyesit. Rexhep Hida, kryetar i shoqatës së përkthyesve – Shqipëria ka emra të shkëlqyer, por çështja e përkthyesit është më shumë te shpërblimi. Do doja që kjo gjë të ndryshonte, të financoheshim më shumë. Edhe javën e ardhshme, Komisioni do të vijojë dëgjesat me grupet e interesit për këtë projektligj.