Edhe sot, Komisioni për Burimet Natyrore nuk u shpreh për shfuqizimin e ligjit të “Paketës së Maleve”. Një ditë më parë, i njëjti komision kërkoi të dhëna mbi efektet financiare që do të sillte revokimi i këtij ligji. “Ne presim përgjigje nga Këshilli i Ministrave dhe Ministria e Financave për të mësuar mbi efektet financiare që do të ketë shfuqizimi i këtij ligji”, shprehet Anila Denaj. Por për deputetin e PD-së, Gazment Bardhi, kjo kërkesë është thjesht një justifikim. “Nuk ka efekte financiare, ende nuk janë bërë investime. Pastaj, në faqen 9 të këtij ligji thuhet se nuk parashikohen efekte financiare, sepse nuk dihet volumi i investimeve”, tha ai. Ndërsa deputeti Blendi Himçi tha se, edhe pa nisur investimet, abuzimet me ligjin kanë filluar që në fazën e aplikimeve. “Unë jam deputet i Elbasanit. Kanë nisur aplikimet dhe është një djalë 25 vjeç. Ligji thotë se duhet ta ketë përdorur për 10 vjet. Si i bie që ky paska punuar që në moshën 15 vjeç? Po përdoren emra”, u shpreh Himçi. Për opozitën, “Paketa e Maleve” nuk do të sjellë zhvillim të zonave rurale, por mund të shkaktojë konflikte për pronësinë. “Ky ligj do të nxisë konfliktet e pronësisë, sepse mjaftojnë 45 ditë shpallje dhe bëhesh pronar, pa qenë pronari real i tokës”, deklaroi Gazment Bardhi. Për kryetaren e Komisionit, Anila Denaj, ligji i “Paketës së Maleve” është një zgjidhje më e mirë se ligji 7501, i cili u aplikua nga qeveria e shkuar. Ajo u shpreh: “Kemi parë që konfliktet e tokës në zonat rurale nuk u shuan as me ligjin 7501, edhe pse duhet thënë që ato toka më pas mbeten djerrë. A nuk meritojnë ata njerëz që kanë tokat atje t’u jepet mundësia t’i zhvillojnë?” “Ky është ligji që të bën pronar në bazë të investimit dhe nuk bën pronar ata që kanë tokat reale”, tha Redi Muçi. Për Denajn, zgjidhja nuk është nxitimi për votim apo shfuqizim të ligjit, por përmirësimi i tij. “Po kërkoni përmirësim, nëse doni zhvillim, dhe jo shfuqizim”, përfundoi ajo.