Shtetet e Bashkuara të Amerikës dënojnë fuqishëm sulmet e koordinuara dhe të dhunshme ndaj Policisë së Kosovës më 24 shtator ku mbeti i vrarë polici Afrim Bunjaku. Zëdhënësi i Departamentit amerikan të Shtetit, Mathew Miller, deklaroi për Radio Europa e Lirë se kundërshtojnë përpjekjet që të barazohet vrasja e rreshterit të Kosovës me sulmuesit që ishin të përfshirë në vrasjen e tij që ndodhi në Banjskë të Zveçanit. “Ne kemi qenë shumë të qartë: SHBA-ja dënon fuqishëm sulmet e koordinuara dhe të dhunshme ndaj Policisë së Kosovës më 24 shtator. Gjithashtu kundërshtojmë përpjekjet për të barazuar vdekjen tragjike të rreshterit të Policisë së Kosovës Afrim Bunjaku me vdekjen e individëve që ishin të përfshirë në vrasjen e një polici. Përgjegjësit duhet të dalin para drejtësisë përmes një procesi hetimor transparent që po zhvillohet”, deklaroi Miller. Një qëndrim të ashpër ka mbajtur edhe Bashkimi Europian, i cili ka kritikuar Serbinë për shpalljen e ditës së zisë për sulmuesit e vrarë në veri të Kosovës, teksa ka theksuar se nuk mund të barazohen viktimat e terrorizmit me terroristët. Zëdhënësi Peter Stano, gjatë konferencës për gazetarët në Bruksel, u shpreh se zyrat e BE-së në Prishtinë ulën flamurin në gjysmështizë gjatë së hënës, pasi u shpall ditë zie për policin e vrarë në sulm, por të njëjtin veprim nuk e kanë bërë me Serbinë, që po ashtu shpalli ditë zie për serbët e vrarë. Pamjet: AFP