Një ditë pasi Sali Berisha sulmoi ish-Sekretarin Amerikan të Shtetit, Anthony Blinken, që mori vendimin për shpalljen “non grata” të kreut të opozitës, duke thënë se ai është vetë “non grata” në SHBA, vjen reagimi nga Departamenti i Shtetit. Rrjeti i njohur amerikan “Fox Neës” i ka kushtuar një shkrim zgjedhjeve parlamentare të 11 Majit në Shqipëri, ku ndalet dhe te shpallja “non grata” e Sali Berishës. Lidhur me këtë çështje, “Fox Neës” i është drejtuar me një shkresë Departamentit Amerikan të Shtetit, por ky fundit ka refuzuar të komentojë. “Berisha pretendon se sanksionet ndaj tij ishin “të bazuara tërësisht në lobimet” e George Soros dhe Ramës. Ai tha gjithashtu se anëtarët e administratës së Biden “e kthyen Ambasadën e SHBA në Tiranë në një zyrë të madhe prokurorie”, duke u kërkuar mbështetësve, gazetarëve dhe njerëzve të biznesit të ndalonin mbështetjen ndaj Berishës dhe partisë së tij dhe se Departamenti i Shtetit ‘u kërkoi vendeve të tjera të më sanksiononin dhe të më izolonin mua’”, shkruan media amerikane. Pas rikthimit të Donald Trump në Shtëpinë e Bardhë, Berisha deklaronte se do i hiqej sanksionimi, por deri më tani nuk ka ndodhur asgjë, ndaj dhe kreu i opozitës u shpreh se “non grata” po e pengon në fushatën e tij elektorale. “Sigurisht që më dhemb, sepse nuk jam në gjendje të takohem me shqiptarët e Amerikës, të cilët janë kaq të shumtë dhe në këto zgjedhje, për herë të parë kanë të drejtë të votojnë partinë dhe kandidatin që preferojnë në vendin e origjinës”. Një zëdhënës i Departamentit të Shtetit tha se ata nuk kishin asnjë koment në lidhje me pretendimet e Berishës se entitetet amerikane i kthyen mbështetësit kundër tij. “Departamenti i Shtetit nuk iu përgjigj pyetjeve të “Fox Neës Digital” nëse sanksionet ndaj Berishës duhen mbajtur në fuqi dhe nëse ato pengojnë zgjedhjet e lira dhe të ndershme në Shqipëri”, shkruan rrjeti amerikan.