Sipas raportit të Departamentit amerikan të shtetit për vitin 2023 të publikuar të hënën, sistemi gjyqësor në Shqipëri po bëhet më i pavarur falë procesit të vetingut dhe veprimeve të SPAK-ut. DASH përmend arrestimet e nivelit të lartë nga SPAK-u dhe dënimet për raste korrupsioni, përfshirë ish-zëvendëskryeministrin dhe ministrin e Financave (dhe deputet i Partisë Socialiste) Arben Ahmetaj si dhe ish-ministrin e Mjedisit Lefter Koka. Në raport përmendet gjithashtu rasti i ish-kryeministrit Sali Berisha dhe i dhëndrit të tij që përfitoi 5 milionë dollarë nga një marrëveshje toke. Në raport vihet vihet në dukje edhe liria e medias, sulmi ndaj Top Channel dhe korrupsioni në nivelet e qeverisjes, të cilat vazhduan të ishin problemet kryesore në Shqipëri gjatë vitit të kaluar. DASH nënvizon se nuk ka pasur ndryshime të konsiderueshme në situatën e të drejtave të njeriut në Shqipëri gjatë vitit 2023, edhe pse qeveria ndërmori hapa të besueshëm për të identifikuar dhe ndëshkuar zyrtarët që mund të kenë kryer shkelje të të drejtave të njeriut. Nuk është përmendur as çështja “Bleri”, e cila mori një vëmendje të veçantë vitin e kaluar në opinionin publik. Fredi Beleri u dënua për korrupsion në zgjedhje, por çështja u amplifikua për shkak të presionit nga Greqia se gjyqësori shqiptar po bënte shkelje. Duke iu referuar zgjedhjeve të fundit, atyre të 14 majit vitin e kaluar në raport thuhet se “në përgjithësi ishin të administruara mirë, konkurruese dhe paqësore”, por edhe ato u shoqëruan edhe me probleme.