Departamenti Amerikan i Shtetit publikoi raportin zyrtar për klimën e investimeve në Shqipëri për vitin 2025, ku vlerësohet stabiliteti makroekonomik i vendit, por ngrihen një sërë shqetësimesh që lidhen me ambientin e biznesit. “Situata makroekonomike e Shqipërisë është e qëndrueshme. Në vitin 2024, rritja ekonomike arriti në 4 përqind, e nxitur nga rritja e fuqishme në sektorët e turizmit dhe pasurive të paluajtshme dhe politikat e kujdesshme makroekonomike.”, thuhet në raport. Në raport theksohet se Shqipëria ka një regjim relativisht liberal për investimet e huaja, që lejon në shumicën e rasteve pronësi 100 % nga investitorët e huaj në sektorë të ndryshëm. Sektoret që në raport përmenden si me potencial të lartë për investime: janë energjia, infrastruktura, teknologjia e informacionit, turizmi, infrastruktura publike. Investimet në infrastrukturë (rrugë, energji, transport) dhe zgjerimi i sektorit të turizmit mund të tërheqin investitorë. Në raport theksohet ndër të tjera se Shqipëria ka ende probleme me çështjet e pronave dhe konfliketet tokave është kyç për projektet që kërkojnë toka ose pronësi të qartë. Ndër sfidat kryesore mbetet korrupsioni dhe mungesa e transparencës vecanërisht në procedurat e prokurimeve publike dhe mënyrës se si përzgjidhen kontraktuaesit. Raporti nxjerr në pah si problem informalitetin e lartë në sektorin e biznesit, i cili po dëmton ndjeshëm konkurrueshmërinë dhe zhvillimin ekonomik të vendit. “Pavarësisht qëndrueshmërisë dhe rritjes së vazhdueshme që ka treguar ekonomia shqiptare në vitet e fundit, zhvillimi ekonomik i saj mbetet i brishtë për shkak të korrupsionit të përhapur, krimit të organizuar, konkurrencës së shtrembëruar, mungesës së fuqisë punëtore për shkak të emigracionit, produktivitetit të ulët dhe një sektori të madh informal.”, thuhet në raport.