Kryetari i Partisë Demokratike, Sali Berisha komentoi sot edhe raportin e publikuar pak ditë më parë nga DASH i cili vlerëson punën e SPAK dhe përmend akuzën e ngritur ndaj liderit të opozitës. Duke folur në një konferencë për shtyp, Berisha thotë se raporti i DASH shprehte vetëm një fakt. “Ai raport, nuk e di kush e ka bërë, shprehte një fakt. Ajo ka ndodhur. Thoshte një fakt që ajo ka ndodhur. Unë e kam denoncuar atë me qindra e mijëra herë”, tha Berisha. Departamenti Amerikan i Shtetit vlerësoi punën e Shqipërisë në luftën ndaj korrupsionit dhe pastrimit të parave. Në raportin për vitin 2024, DASH thekson se Shqipëria vazhdon të bëjë përparime, por bën thirrje për zbatimin e plotë të reformave. Në raportin për vitin që lamë pas, DASH sjell në vëmendje edhe masën ndaj Sali Berishës dhe dhëndrit të tij, për dosjen “Partizani”.