Një konflikt i nisur në orët e para të mëngjesit në rrugën “Butrinti” në Sarandë ka përfunduar me arrestimin e gjashtë personave dhe shpalljen në kërkim të një tjetër. Ngjarja ndodhi rreth orës 03:20, në ambientet e jashtme të një lokali, ku sipas Policisë, rojet e sigurisë po konfliktoheshin me disa persona të tjerë. Në atë moment, Shefi i Hetimit të Krimit të Komisariatit të Sarandës, Mateo Bakalli, ka ndaluar me automjetin e tij dhe ka ndërhyrë për të ndarë personat që po konfliktoheshin. Gjatë ndërhyrjes, ai është goditur me grusht nga një prej personave të përfshirë në konflikt. I kontaktuar nga Top Channel, Bakalli tha se është në gjendje të mirë shëndetësore, ndodhet në punë dhe nuk ka pësuar plagë. Në vendngjarje kanë mbërritur shërbimet e “Shqiponjave” dhe Forcat Kombëtare të Sigurisë, të cilat kanë neutralizuar situatën dhe kanë shoqëruar personat e përfshirë. Në vijim të veprimeve, Policia ka arrestuar Marjo Katiraj, 35 vjeç, administrator i lokalit, Elgent Ndoj, 38 vjeç, Faik Hoxha, 35 vjeç, Indrit Cullhaj, 34 vjeç, Ardit Kasemi, 31 vjeç, ushtarak në Zall-Herr dhe roje sigurie në lokal, si dhe Besnik Sullollari, 29 vjeç, taksist. Ndërkohë, Pjetër Doçi, 28 vjeç, roje sigurie, është shpallur në kërkim. Por përplasja ka sjellë edhe masa ndaj dy punonjësve të Policisë. Drejtorii Përgjithshëm i Policisë së Shtetit, Skënder Hita, ka urdhëruar pezullimin nga detyra të Armando Shehit, efektiv i Repartit “RESI”, dhe Andon Binakut, efektiv i RENEA-s. Sipas Policisë, dy efektivët ishin të dypunësuar pa leje në lokalin ku ndodhi konflikti dhe nuk kanë njoftuar Policinë për përplasjen. Për ta ka nisur hetimi disiplinor nga Drejtoria e Standardeve Profesionale. Ndërkohë, Top Channel disponon pamje nga momenti i shoqërimit të një prej personave të ndaluar, ku duket një përplasje fizike mes efektivëve dhe të ndaluarit. Pamjet do të verifikohen në kuadër të hetimit. Prokuroria e Sarandës vijon hetimet për zbardhjen e plotë të ngjarjes dhe përgjegjësitë e personave të përfshirë.