Momenti kur 59-vjeçari Rafael Molina u qëllua për vdekje nga policia në Florida pak minuta pasi kishte vrarë një koleg në një stacion autobusi, u filmua nga kamera në veshjen e një prej oficerëve. Në video shihen policët teksa i afrohen autobusit ku ishte 59-vjeçari dhe hapin zjarr. Sipas kreut të policisë, Molina qëlloi 6 herë në drejtim të policisë, ndërsa efektivët u përgjigjën me të paktën 50 plumba. “Ai kishte vendosur se çfarë do të bënte atë ditë dhe donte të vriste sa më shumë njerëz, përfshirë edhe oficerë policie”, tha një prej efektivëve. Siç u bë e ditur, 59-vjeçari pak para betejës me policinë kishte vrarë kolegun e tij 42-vjeçar, Warren Chambers. Sipas pamjeve të një kamere sigurie, pasi ndërroi rrobat, ai nxori armën nga çanta e drekës që kishte me vete dhe qëlloi disa herë 4kolegun nga një distancë e shkurtër. Sipas mediave amerikane, shkak i vrasjes është bërë një sherr mes 59-vjeçarit dhe 42-vjeçarit, por nuk dihen detaje të tjera.