Deputetja socialiste Zegjine Caushi ka reaguar për ngjarjen e rëndë në Roskovec, ku daja i saj, Bledar Bakaj, akuzohet se ka dhunuar dhe ka mbajtur peng për 45 ditë një 34-vjeçare, e më pas ka plagosur edhe babanë e saj. Caushi ka publikuar një foto të Bakajt me 34-vjeçaren dhe tregon se i ka takuar rastësisht në fillim të qershorit. Megjithëse mediat janë përpjekur të mos publikojnë identitetin e gruas së dhunuar, ligjvënësja Zegjine Caushi nuk e ka marrë në konsideratë se ajo konsiderohet viktimë e dhunës, por ka publikuar foto si dhe emrin e plotë të 34-vjeçares, pa marrë parasysh pasojat për të dhe familjen. Sipas deputetes, gruaja e dhunuar dhe daja i saj i kanë thënë se kishin vendosur të martoheshin, pavarësisht kundërshtimit të babait të 34-vjeçares. “Dua ta them shumë qartë: dënoj me forcë çdo formë DHUNE, pavarësisht se nga KUSH është ushtruar. Në të njëjtën kohë, mendoj se ky është një rast që duhet të trajtohet me kujdes edhe nga këndvështrimi psikologjik, për të dy personat. Për pjesën tjetër, organet ligjzbatuese duhet të bëjnë punën e tyre” Caushi shton se ky rasti të trajtohet me seriozitet, me qëllim gjetjen e zgjidhjes së duhur dhe parandalimin e çdo përshkallëzimi të mëtejshëm.