Nivel shqetësues dhune raportohet mes të rinjve në francez, pas vdekjes së një nxënësi 15-vjeçar, i cili u rrah pranë shkollës së tij. I mituri u sulmua nga disa persona teksa doli nga shkolla të enjten pasdite në Viry-Chatillon, rreth 20 km në jug të Parisit. Sipas dëshmitarëve, ai u godit me grushte e shkelma nga sulmuesit që i dolën para të maskuar. Pas dhunës, ai pësoi arrest kardiak dhe një ditë më vonë ndërroi jetë, sipas BBC-së. “Kjo dhunë ekstreme po bëhet e zakonshme”, tha kryebashkiaku i qytetit, Jean-Marie Vilain, që e përshkroi ngjarjen si të pakuptimtë. Më herët, presidenti francez Emmanuel Macron tha se shkollat duhet të “mbrohen” nga “dhuna e pafrenuar midis adoleshentëve dhe fëmijëve gjithnjë e më të vegjël”. Ky ishte incidenti i dytë i tillë brenda një jave në Francë, pasi një vajzë 13-vjeçare u sulmua jashtë shkollës së saj në Montpellier të martën. Tensionet në shkollat franceze janë rritur pas vrasjes së dy mësuesve, një në 2020 dhe një tjetër në tetor të vitit të shkuar. Javën e kaluar, drejtori i një shkolle në Paris dha dorëheqjen për shkak të kërcënimeve me vdekje. Sikurse raportohet, ai u akuzua në mënyrë të rreme se kishte goditur një studente për shkak se mbante një shami në shkollë.