Shtetet e Bashkuara presin rihapjen e një pike kalimi kufitar mes Rripit të Gazës dhe Egjiptit për të mundësuar dërgimin e ndihmave humanitare, por nuk dihet ende se kur do të ndodhë kjo. Sekretari Amerikan i Shtetit Antony Blinken, u rikthye në Izrael, pas turit në Jordani, Bahrein, Katar, Emiratet e Bashkuara Arabe dhe Egjipt në kuadër të përpjekjeve për të shmangur zgjerimin e konfliktit në rajon. Blinken u prit nga ministri i Mbrojtjes i Izraelit të cilit i tha se Shtetet e Bashkuara po bashkëpunojnë me Egjiptin, Izraelin dhe Kombet e Bashkuara për t’u siguruar që ndihmat të mbërrijnë në Gazë, në mbështetje të atyre që kanë nevojë. “Secili prej partnerëve ndan të njëjtën pikëpamje për të parandaluar zgjerimin e konfliktit, ruajtjen e jetëve të pafajshme dhe për t’u ofruar ndihmë atyre që kanë nevojë në Gazë”, tha Blinken Ministri i Mbrojtjes së Israelit, Yoav Gallant tha se Izraeli do nisë “një fushatë të gjatë por të suksesshme kundër militantëve të Hamasit. "Kjo do të jetë një luftë e gjatë, çmimi do të jetë i lartë, por ne do të fitojmë -- për Izraelin, për popullin hebre dhe për vlerat në të cilat besojnë të dy vendet. Sekretari amerikan rikonfirmoi sakaq edhe angazhimin e Shteteve të Bashkuara për t’i ofruar Izraelit ndihmën e nevojshme për mbrojtjen e qytetarëve të saj. Ndërkohë që gjatë takimit në Kajro me presidentin e Egjiptit, Sekretari Blinken tha se është me shumë rëndësi mënyra se si Izraeli ushtron të drejtën për t’u mbrojtur. Ndërsa më shumë se 1 milionë palestinezë mund të largohen për shkak të rrezikut nga konflikti, Shtetet e Bashkuara kanë shtuar thirrjet për mbrojtjen e të pafajshmëve.