Në telefonatën mes Donald Trump dhe Volodymyr Zelensky ndodhën dy gjëra të papritura: në linjë ishte edhe Elon Musk, dhe ajo që dëgjoi presidenti ukrainas nga homologu amerikan e qetësoi atë deri diku. Sipas Axios, detajet e reja të telefonatës nënvizojnë se sa ndikues mund të jetë Musk në administratën e re të Trumpit dhe pasigurinë rreth mënyrës se si republikani do t’i qaset Ukrainës. Mesazhet publike të Trumpit gjatë fushatës zgjedhore kanë ngritur shqetësime në Kiev dhe në të gjithë Evropën. Trump ka premtuar një zgjidhje të shpejtë për luftën, por ka refuzuar të thotë se kush duhet të fitojë. Ai gjithashtu ka kritikuar paketat e mëdha të ndihmës që po i dërgohen Ukrainës nga SHBA. Administrata e Joe Bidenit tani po kërkon mënyra për të dërguar sa më shumë ndihmë ushtarake Ukrainës përpara 20 janarit, kur Trump mund ta ndërpresë atë. Por, bisedat private që Trump dhe ekipi i tij kanë zhvilluar me Zelenskyn gjatë dy muajve të fundit – përfshirë atë të djeshmen – kanë qetësuar disi ukrainasit.