Muaji prill i këtij viti ka regjistruar temperaturën më të lartë ndonjëherë në glob sa i përket këtij muaji, duke tejkaluar mesataren e temperaturave të viteve 1991-2020 me 0,67 gradë celsius. Referuar të dhënave të Bashkimit Europian mbi ndryshimet klimatike, prilli që sapo kaluam është muaji i 11-të radhazi me temperatura globale që kanë thyer rekordin, sipas shkencëtarëve të BE-së. Temperaturat e këtij muaji prill ishin 1.58 gradë celsius më të larta se mesatarja e viteve 1850-1900 të periudhës para industriale. Po të vëresh temperaturat mesatare globale që prej majit të vitit 2023 deri në prill të vitit 2024 është periudha me temperatura më të larta që nga fillimi i regjistrimeve dhe është 1,61 gradë celsius mbi mesataren para-industriale. Përgjatë muajit prill, jo vetëm Evropa Perëndimore por edhe rajonet e Evropës Lindore përjetuan temperatura mbi mesataren. Rritje të ndjeshme të temperaturës u vunë re në Amerikën Veriore dhe atë të Jugut, në Groenlandë, Azinë Lindore, Lindjen e Mesme dhe pjesën më të madhe të Afrikës. Sipas Agjencisë Europiane të Mjedisit, përqendrimi në rritje i gazrave serrë do të vazhdojë të nxisë temperaturat globale drejt rekordeve të reja. Pamjet: AFP