Çahet rruga Librazhd-Prrenjas pranë vendit të quajtur “Arrat e Gurrës” duke përbërë rrezik për përdoruesit e këtij aksi rrugor. Rrëshkitjet e tokës përgjatë luginës së Lumit Shkumbin prej disa ditësh kanë krijuar një çarje masive në asfalt e cila tashmë është kthyer në rrezik duke detyruar autoritetet të bllokojnë njërën korsi duke e rregulluar qarkullimin me një korsi përmes semaforëve. Sipas njoftimit zyrtar, Autoriteti Rrugor Shqiptar ka ndërhyrë me masa paraprake emergjente për të parandaluar aksidente të mundshme dhe për të garantuar sigurinë e qarkullimit. Në koordinim me Policinë e Shtetit, duke nisur nga dita e sotme do të aplikohet kufizim i lëvizjes me një korsi në zonën ku ka ndodhur rrëshqitja dhe do të vendoset semafor për disiplinimin e trafikut, me kalim të alternuar të mjeteve. Këto masa janë vlerësuar si të domosdoshme për të shmangur çdo incident në një segment që për shkak të dëmtimeve të terrenit paraqet rrezik të shtuar. Në fazën e dytë të ndërhyrjes do të realizohet një korsi provizore në të majtë të trupit të rrugës, me qëllim rikthimin e qarkullimit në dy sense dhe lehtësimin e trafikut. Autoritetet u bëjnë apel drejtuesve të mjeteve dhe banorëve të zonës për mirëkuptim dhe respektim të sinjalistikës rrugore, duke theksuar se kufizimet janë të përkohshme, por të domosdoshme për garantimin e sigurisë rrugore në këtë aks të rëndësishëm që lidh Lindjen me Juglindjen e vendit. Përpos punimeve dhe kaosit që aktualisht është i pranishëm çdo ditë në këtë aks të rëndësishëm kombëtar, kjo shembje do të rëndojë trafikun dhe vështirësinë e lëvizjes në këtë rrugë.