Për të shmangur mbylljen e pjesshme të qeverisë amerikane, Dhoma e Përfaqësuesve, e kontrolluar nga republikanët, miratoi një projektligj për një buxhet afatshkurtër. Nisma ligjore do të shërbejë vetëm nëse miratohet në Senat, e më pas të firmoset nga presidenti. Nëse merret aprovimi, atëherë Kongresi do të ketë 45 ditë kohë për gjetur një kompromis për miratimin e buxhetit të plotë për vitin e ri fiskal. Nëse nuk arrihet një marrëveshje për një buxhet të përkohshëm, atëherë rreth 4 milionë punonjës të qeverisë federale dhe pjesëtarë të shërbimit ushtarak të Shteteve të Bashkuara, nuk do të paguhen gjatë kësaj periudhe. Disa punonjës në detyra thelbësore për mbarëvajtjen e vendit dhe sigurinë kombëtare do të vazhdojnë të ushtrojnë detyrat e tyre pavarësisht miratimit apo jo të buxhetit. Po ashtu pritet të mbyllet dhe një pjesë e programeve të ndihmës për familjet në nevojë. Kundërshtitë brenda republikanëve, që kontrollojnë Dhomën e Përfaqësuesve, kanë bërë që të mos gjendet dakordësia për buxhetin e ri. Ndërkohë senati, që kontrollohet nga demokratët, po punon për një plan financimi 7-javor, që do të mbante hapur qeverinë deri në mes të muajit nëntor, duke u dhënë më shumë kohë ligjvënësve për të hartuar një buxhet të plotë për vitin e ardhshëm financiar, që fillon më 1 tetor. Megjithatë, kryetari i Dhomës së Përfaqësuesve, që kontrollohet nga republikanët, Kevin McCarthy, ka refuzuar që plani i Senatit të hidhet për votim në Dhomën e Përfaqësuesve. Republikanët e vijës së ashpër kërkojnë shkurtime më të thella, me rreth 120 miliardë dollarë shkurtime shtesë vetëm për vitin e ri fiskal, gjë që mund të ndikojë tek programe që nga arsimi dhe mbrojtja e mjedisit e deri tek hulumtimet mjekësore. Pamjet: AFP