Presidenti i Shteteve të Bashkuara të Amerikës Donald Trump, pas takimit me homologun ukrainas, Volodymyr Zelensky, ka deklaruar se po e konsideron mundësinë t’i dërgojë Ukrainës më shumë sisteme të mbrojtjes ajrore ‘Patriot’ për t’u mbrojtur nga sulmet e intensifikuara të Rusisë. Takimi është zhvilluar në samitin e NATO-s që është mbajtur në Hagë. Që të dy liderët kanë bërë të ditur se takimi afro 50-minutësh ishte hap pozitiv për t'i dhënë fund luftës që tashmë ka hyrë në vitin e saj të katërt. Gjatë konferencës për shtyp, presidenti amerikan ka thënë se armët e këtij lloji “janë shumë të vështira për t’u marrë” porse do të “shohim nëse mund t'i bëjmë disa prej tyre të disponueshme”. Duke folur para medias ai pati edhe një episod që u bë viral, pasi një gazetare ukrainase zhvilloi një bisedë emocionuese me presidentin e SHBA. “A do ti jepni ukrainës sisteme mbrojtëse “patriot””, ishte pyetja e saj. Trump fillimisht e pyeti nga ishte dhe kur gazetarja i tha se ishte nga Ukkraina, dhe se burri i saj ishte ushtar, ndërsa ajo jetonte në Oslo me fëmijët, atëherë presidenti amerikan deklaroi: “Në rregull, më lejo të them se ne do të shohim nëse mund të vëmë disa në sisteme në dispozicion. Janë shumë të vështira për t’u siguruar. Edhe ne kemi nevojë për to. Kemi furnizuar Izraelin dhe janë shumë efektive, 100 për qind efektive. Ishte një pyetje shumë e mirë. Ju uroj shumë fat. Shoh që kjo gjë ju prek vërtet. Prandaj, dërgojini një përshëndetje burrit tuaj”. Trump përsëriti se ka biseduar disa herë me presidentin rus Putin, por kjo ishte “lufta më e vështirë për t’u zgjidhur në krahasim me luftrat e tjera”.