Franca dhe Britania do të dorëzojnë një rezolutë gjatë mbledhjes urgjente të Kombeve të Bashkuara në fillim të javës duke propozuar krijimin e një zone të sigurt në Kabul, me qëllimin të mbrohen njerëzit që po tentojnë të largohen nga Afganistani. Njoftimin e bëri presidenti francez, Emmanuel Macron, i cili sqaroi se “draft-rezoluta ka për qëllim krijimine një zone e cila të jetë nën kontrollin e OKB-së dhe të lejojë vazhdimin e operacioneve humanitare”. Gjatë vizitës së tij në Mosul të Irakut, Macron kishte deklaruar se shpreson që një propozim i tillë të përkrahet. “Nuk shoh se kush mund ta kundërshtojë vazhdimin e sigurt të operacioneve humanitare”, tha shefi i Elizesë për gazetarët. Sekretari i Përgjithshëm i OKB-së, Antonio Guterres ka kërkuar një takim urgjent të Këshillit të Sigurimit për të diskutuar krizën në Afganistan. Macron u shpreh një ditë më parë se Franca do të zhvillojë diskutime me talibanët lidhur me situatën humanitare në vend dhe për mundësinë e evakuimit të më shumë njerëzve. Forcat amerikane, që ruajnë aeroportin e Kabulit, kanë filluar tërheqjen dhe duhet ta mbyllin tërheqjen e tyre në 31 gusht.