Në Kalabri dhe në të gjithë Italinë është dhënë alarmi pasi një person humbi jetën dhe nëntë të tjerë u shtruan në spital, pas helmimit nga brokoli. Prokuroria e Paolës urdhëroi sekuestrimin urgjent të produktit ushqimor të dyshuar për helmim: bëhet fjalë për kavanozë me brokoli në vaj, që i mori jetën Luigi Di Sarno, 52 vjeç, turist nga Napoli, i cili po kalonte pushimet në Kalabri. Është vendosur bllokimi dhe tërheqja nga tregu i të gjitha kavanozëve me brokoli në vaj, në përpjekje për të parandaluar raste të tjera të mundshme të helmimit. Në një njoftim zyrtar, Departamenti i Shëndetësisë i Rajonit Kalabri bëri me dije se është aktivizuar protokolli emergjent, në bashkëpunim me Qendrën kundër helmimit të Pavias, e vetmja në Itali e autorizuar për menaxhimin e rasteve të botulizmit. Vetëm disa ditë më parë, një tjetër intoksikim serioz me botulizëm u regjistrua në Sardenjë, gjatë një eventi gastronomik të quajtur “Fiesta Latina”. Tetë persona përfunduan në spital me simptoma të ngjashme dhe dyshohet se shkaktar ishte një sallatë guakamol.