Më shumë se 300 trupa nga Mbretëria e Bashkuar do të dislokohen në Kosovë për ato që misioni paqeruajtës i NATO-s në Kosovë, KFOR, i përshkruan si “stërvitje rutinë”. Manovrat do të zhvillohen nga 18 shtatori deri në fund të tetorit, thuhet në një deklaratë të KFOR-it, ku nuk specifikohet megjithatë vendi ku do të mbahën stërvijet, të cilave i bashkohet edhe kontingjenti britanik, nga Regjimenti Mbretëror i Jorkshërit. Aty nënvizohet megithatë se manovrat kanë për qëllim “të testojnë procedurat ekzistuese për dislokimin e shpejtë të trupave shtesë dhe integrimin e tyre në kuadër të misionit". Misioni paqeruajtës i NATO-s në Kosovë ka bërë të ditur, po ashtu, se stërvitjet do të mbështesin gatishmërinë e KFOR-it “për t’iu përgjigjur zhvillimeve të rëndësishme të sigurisë”. Njoftimi për dislokimin e trupave shtesë dhe për stërvitje vjen disa disa javë pasi KFOR-i zhvilloi atë që e quajti “trajnim” mbi urën e Ibrit, që ndan Mitrovicën në jugun e banuar me shqiptarë dhe veriun e banuar me serbë. Ndërkohë, sekretari i Shtetit i Vatikanit, kardinali Pietro Parolin, u takua në Beograd me presidentin e Serbisë, Aleksandar Vuçic, me të cilin kanë diskutuar, mes tjerash, edhe për Kosovën. Vucic pohoi përmes një postimi në Instagram, se gjatë bisedës ka nënvizuar se “çështja e mbrojtjes, respektimit dhe përmirësimit të të drejtave të serbëve dhe të popullatës tjetër joshqiptare” në Kosovë është e rëndësisë kyçe për Serbinë, ndërsa shtoi se vendi tij e vlerëson lart qëndrimin e Selisë së Shenjtë karshi pavarësisë së Kosovës. Vatikani është një ndër vendet evropiane që nuk e njeh mëvetësinë e saj dhe insiston që zgjidhja e ngërcit në marrëdhëniet dypalëshe të arrihet vetëm përmes dialogut.