Princi Harry trazon sërish ujërat në familjen mbretërore në Britaninë e Madhe. Së fundmi ai ka shprehur gatishmërinë për një pajtim me familjen, ndërsa zbulon me keqardhje se nuk komunikon prej muajsh me të atin, Mbretin Charles i Tretë. Në një intervistë për BBC-në, e zhvilluar nga vila e tij në Kaliforni, Duka i Sussex shprehu shqetësimin për shëndetin e babait të tij, i cili një vit më parë iu nënshtrua një operacioni për kancer. “Kam kaq shumë mosmarrëveshje me disa anëtarë të familjes sime, por unë i kam falur ata,” tha Harry. “Disa prej tyre nuk do të më falin kurrë që shkrova librin ‘Spare’, por unë jam gati për pajtim.” Ai shtoi se është i pikëlluar nga fakti që Mbretit Charles nuk i flet, për shkak të çështjes së sigurisë që vazhdon ta përçajë me familjen. Të njëjtën ditë, Gjykata e Apelit në Londër hodhi poshtë përfundimisht kërkesën e Harry-t për një eskortë automatike gjatë vizitave të tij në Mbretërinë e Bashkuar. Ai, Meghan Markle dhe fëmijët e tyre, Archie dhe Lilibet, nuk do të kenë më të drejtën për mbrojtje të garantuar policore, siç kishin më parë. Vendimi u transmetua drejtpërdrejt nga Sir Geoffrey Vos, president i trupit gjykues, i cili pranoi arsyetimin emocional dhe njerëzor të princit, por theksoi se braktisja nga Harry e rolit të tij aktiv në familjen mbretërore e ndryshoi statusin e tij ligjor dhe të sigurisë në mënyrë të paprecedentë. Gjykata vlerësoi se Ministria e Brendshme kishte vepruar në përputhje me ligjin dhe kishte garantuar që çdo masë sigurie do të ofrohej rast pas rasti, në bazë të rreziqeve të vlerësuara gjatë vizitave të princit në Britani. Harry theksoi se për të kjo është një çështje parimore: “Mbretëria e Bashkuar është ende shtëpia ime. Është pjesë e trashëgimisë së fëmijëve të mi. Por nuk mund të kthehem pa siguri.” Ai kujtoi kërcënimet që ka marrë nga grupe terroriste për shkak të pjesëmarrjes së tij në luftën në Afganistan, dhe traumat që i kanë mbetur nga ndjekja e nënës së tij, Lady Diana, nga paparacët – një ndjekje që përfundoi tragjikisht në Paris.