Kryeministri i Mbretërisë së Bashkuar Rishi Sunak foli sot në parlament për konfliktin izraelito-palestinez. Sunak njoftoi se gjashtë shtetas britanikë janë konfirmuar të vdekur dhe 10 të tjerë janë të zhdukur pas sulmit të Hamasit në Izraelin jugor ndërsa bëri thirrje që Egjipti të ndihmojë në evakuimin e shtetasve të huaj nga Gaza. “Ne po punojmë me vendet fqinje për evakuimin e qytetarët tanë në Gaza dhe Bregun Perëndimor. Unë kam folur në mënyrë specifike me Presidentin e Egjiptit për mbështetjen e civilëve që të largohen nga Gaza nga vendkalimi kufitar Rafa, i cili aktualisht mbetet i mbyllur”, tha kryeministri britanik. Zoti Sunak tha në fjalën e tij se Izraeli gëzon të drejtën për t'u përgjigjur me forcë sulmit të Hamas "në përputhje me ligjin ndërkombëtar humanitar". Ai gjithashtu thotë se Mbretëria e Bashkuar qëndron në krah të myslimanëve britanikë dhe njofton një rritje të ndihmës për palestinezët, duke thënë se "ata janë gjithashtu viktima të Hamasit". "Jam krenar që ne jemi ofrues afatgjatë dhe të rëndësishëm të ndihmave humanitare për popullin palestinez. Në mes të këtij konflikti po e rrisim ndihmën tonë me një të tretën, me një mbështetje shtesë prej 10 milionë paund. Me këtë ndihmë synojmë t’i vimë sadopak në ndihmë krizës akute humanitare që po shpaloset atje. Ne duhet të mbështesim popullin palestinez sepse edhe ata janë viktima të Hamasit.", tha kryeministri Rishi Sunak ndër të tjera.