Një projektligj që ndalon blerjen e duhanit për çdo person të lindur pas vitit 2008 ka përfunduar shqyrtimin në parlamentin britanik, në një iniciativë që ministrat shpresojnë se do të krijojë një “gjeneratë jo duhanpirësisht”. Sipas legjislacionit në fjalë, që ndalon shitjen e cigareve dhe produkteve të nikotinës. çdo person i lindur më 1 janar 2009 ose më vonë, nuk do të mund të blejë ligjërisht duhan në Mbretërinë e Bashkuar. Nisma përshkruhet si një përpjekje për të shpëtuar jetë dhe për të ulur ngarkesën mbi sistemin e shëndetit publik, NHS. Zyrtarisht, ligji bëhet i vlefshëm pas marrjes së miratimit mbretëror. Rruga e tij në parlament filloi më 5 nëntor 2024 dhe përfundoi të martën, kur Dhoma e Lordëve miratoi ndryshimet e propozuara nga deputetët në Dhomën e Komunëve. Ministrat mendojnë se ky ligj do të çojë me kohë në ndalimin e plotë të shitjes së produkteve të duhanit dhe do të ndërpresë ciklin e varësisë dhe pasojat negative të lidhura me duhanin. Sipas ligjit të ri, i miratuar nga Parlamenti britanik, as cigaret tradicionale dhe as pajisjet elektronike të duhanit (vape) nuk do të mund të blihen ligjërisht nga ky brez, edhe pasi ata të arrijnë moshën madhore. Masa parashikon gjithashtu rritjen graduale të moshës ligjore për blerjen e duhanit çdo vit, deri në eliminimin e tij të plotë nga tregu. Zyrtarët britanikë e kanë cilësuar këtë vendim si një hap historik në mbrojtjen e shëndetit publik, duke theksuar se synimi është krijimi i një gjenerate pa varësi nga nikotina. Nëse ligji nënshkruhet nga Mbreti Charles, Mbretëria e Bashkuar do të bëhet vendi i parë në botë që ndërmerr një masë të tillë ligjore për eliminimin gradual të duhanit nga shoqëria.