Të paktën 21 persona kanë humbur jetën dhe dhjetëra të tjerë janë plagosur pas një sulmi masiv ajror rus që goditi Kievin gjatë natës, në atë që kryebashkiaku i kryeqytetit ukrainas, Vitali Klitschko, e cilësoi si sulmin më të rëndë ndaj qytetit në më shumë se katër vite lufte. Sipas autoriteteve ukrainase, Rusia përdori afro 500 dronë dhe mbi 70 raketa, përfshirë raketa balistike dhe me lundrim, duke goditur Kievin dhe zona të tjera të Ukrainës. Shpërthime të fuqishme u dëgjuan për orë të tëra, ndërsa sistemet e mbrojtjes ajrore ukrainase u përpoqën të neutralizonin sulmet. Një nga goditjet më shkatërruese preku një pallat nëntëkatësh në bregun e majtë të lumit Dnipro, ku një pjesë e madhe e ndërtesës u shemb plotësisht. Ekipet e shpëtimit vijuan gjatë gjithë ditës kërkimet mes rrënojave në përpjekje për të gjetur të mbijetuar. Autoritetet njoftuan se rreth 70 persona janë dërguar në spital, ndërsa bilanci i viktimave pritet të rritet pasi operacionet e kërkim-shpëtimit vazhdojnë. Për shkak të alarmit ajror, mbi 50 mijë banorë të Kievit kaluan natën në stacionet e metrosë, të cilat u shndërruan në strehimore. Shumë prej tyre kishin marrë dyshekë dhe çadra për të kaluar orët e natës nën tokë. Presidenti ukrainas, Volodymyr Zelensky, i cili u kthye më herët nga vizita e tij në Irlandë, vizitoi zonat e goditura dhe deklaroi se dëmet do të kishin qenë më të vogla nëse aleatët do të kishin përmbushur premtimet për furnizimin e Ukrainës me më shumë sisteme të mbrojtjes ajrore. Ndërkohë, Ministria ruse e Mbrojtjes deklaroi se sulmet ishin një përgjigje ndaj goditjeve ukrainase brenda territorit rus dhe se objektivat ishin infrastruktura ushtarake dhe energjetike. Nga ana tjetër, ministri i Jashtëm ukrainas, Andrii Sybiha, e quajti “imorale” justifikimin e Moskës, duke theksuar se Ukraina ka të drejtën të mbrohet ndaj agresionit rus.