Erjon Braçe reagoi ashpër pas incidenteve të regjistruara gjatë protestës së zhvilluar përpara Kuvendit. Deputeti socialist përmes një postimi në rrjetet sociale, e cilësoi situatën si një sulm të organizuar ndaj deputetëve dhe institucioneve. “Kjo nuk është Shqipëria e re! Ky është kaosi i ri! Për tre orë rresht sot, në rrethinat e Kuvendit, në çdo rrugë hyrëse e dalëse të tij, ka pasur një sulm të gjatë e të lejuar ndaj çdo deputeti të Kuvendit.” Braçe kritikoi edhe Policinë e Shtetit për mënyrën se si, sipas tij, u menaxhua protesta, duke thënë se efektivët lejuan për disa orë incidentet pranë Kuvendit. “Sulmi e goditja e policit të shtetit ka si pasojë rënien e shtetit. Shqiptarët e kanë vuajtur pafund rënien e shtetit. Kjo nuk është Shqipëria e re, por ky është kaosi i ri i udhëhequr nga dhuna ndaj kujtdo dhe dominimi i kriminelëve që kanë foltore e mikrofon.” Deputeti socialist u shpreh se përgjegjësia duhet të fokusohet tek aktet e dhunës ndaj institucioneve dhe punonjësve të policisë.