Presidenti i Republikës Bajram Begaj uroi besimtarët katolikë për zgjedhjen e Papës së ri. “Urime katolikëve shqiptarë dhe atyre të gjithë botës për zgjedhjen e Papës së ri”, shkroi ai në profilin e tij zyrtar në Facebook. Nga radhët e Kishës Katolike në Shqipëri, Presidenti i Konferencës Ipeshkvnore, Dom Gjergj Meta, përcolli një mesazh falënderimi dhe përkushtimi: “Kardinalët i dhanë një Ipeshkëv Romës dhe një Bari Kishës Universale. Ne e falenderojmë Zotin dhe i lutemi që Papa të ketë ndihmën dhe mbrojtjen e Hyjit e të Zojës së Këshillit të Mirë. Katolikët shqiptarë kanë qenë gjithmonë besnikë ndaj Papës deri në martirizim”, shkruhej në mesazhin e tij. Zgjedhja e Papës “Leoni XIV”, i pari Papë me origjinë amerikane, ka ngjallur reagime të shumta në mbarë botën, si nga liderë politikë ashtu edhe fetarë. Presidenti amerikan Donald Trump e priti me entuziazëm, duke e cilësuar si “një nder të madh për vendin tonë.” Në një postim në platformën e tij Truth Social, Trump shkroi: “Urime Kardinalit Robert Francis Prevost. Është një nder i madh të dimë se ai është Papa i parë amerikan. Çfarë emocioni dhe çfarë nderi i madh për vendin tonë. Pres me padurim të takoj Papën e ri. Do të jetë një moment shumë domethënës!”. Ndërkaq kryeministrja italiane Giorgia Meloni shprehu “urimet më të sinqerta” dhe theksoi rëndësinë e fjalëve të Papës së ri: “Në një kohë të shënuar nga konflikti dhe ankthi, fjalët e tij janë një thirrje e fuqishme për paqe, vëllazëri dhe përgjegjësi.” , tha ajo.